Фудбалерите на Барселона се лидери на табелата во шпанската Ла Лига, но имаат ист број бодови како и Атлетико, односно бод повеќе од Реал Мадрид, со тоа што двата тима од главниот град на Шпанија имаат натпревар помалку.
Не така одамна, Каталонците имаа солидна предност во домашното првенство, целата европска јавност зборуваше дека избраниците на тренерот Ханси Флик го играат најубавиот фудбал на континентот, а потоа следеа низа променливи игри.
Последната беше во неделата вечерта кога Барса како домаќин беше поразена од Леганес со 0:1, што е нивен втор последователен пораз на домашен терен, по поразот од Лас Палмас во 15-тото коло одиграно на последниот ден од ноември.
Она што е најинтересно во целата приказна е неверојатниот податок дека Каталонците само трет пат во 21 век загубиле два натпревара по ред на домашен терен. Последен пат тоа беше под водство на претходниот тренер Чави Ернандес, а претходно во 2003 година, кога на клупата седеше српскиот стручњак Радомир Антиќ.
Фудбалерите на Барселона ќе имаат можност да ја прекинат таа серија следниот викенд кога го пречекуваат Атлетико, но таа задача нема да биде лесна откако „јорганџиите“ имаат низа од 11 победи во сите натпреварувања. Ако повторно загубат ќе постават рекорд во овој век со три домашни порази во низа.
