Знаеме како кофеинот делува на човечкиот организам – некои велат дека без кафе наутро не може добро да им почне денот, но како оваа состојка делува на другите животински видови?
Пчелите кои консумирале кофеин може да бидат подобри при опрашување – се чини дека исто како и многумина од нас, тие уживаат во кофеинот.
Истражувачите од Универзитетот во Гринич во Лондон, предводени од експертката за однесување и екологија на инсекти, Сара Арнолд, открија дека пчелите што внесуваат кофеин во телото ја вршат својата работа подобро од оние кои не зеле „доза“ кофеин.
Пчелите со кофеин се подобро способни да најдат целни култури и поефикасно да го спроведат опрашувањето. Исто така, се чини дека пчелите уживаат во конзумирање кофеин. Пчелите кои биле тестирани имале поголема веројатност да бараат растенија чиј нектар содржи кофеин. Се покажа дека кофеинскиот нектар го подобрува фокусот и меморијата на пчелите.
Што значи ова за земјоделството низ целиот свет? Студијата може да се примени за комерцијални пчели што ги опрашуваат целните култури во земјоделската индустрија. Пчелите што се одгледуваат можат да добијат кофеин и да бидат обучени да опрашуваат одредени култури, со што ќе се зголеми земјоделското производство. Ова, пак, може да ја зголеми достапноста на храна во областите каде што е потребно, велат истражувачите.