Нутриционистите тврдат дека семето од лен треба да го вклучиме во секојдневната исхрана.
Од подобрување на варењето и намалување на ризикот од многу болести до подобрување на когнитивната функција, постојат многу начини на кои консумирањето ленено семе може да помогне во одржувањето на целокупното здравје, пренесува Eat This.
Со оглед на тоа дека е богато со растителни влакна, лененото семе одлично делува на подобрување на варењето и регулирање на метаболизмот. Всушност, ако сакате едноставно да го зголемите внесот на влакна, додавањето ленено семе во вашиот оброк може да биде одличен начин за почеток. Една лажица цело ленено семе има речиси три грама влакна, што е 11 отсто од препорачаната дневна вредност.
Покрај поздравото варење и побрз метаболизам, консумацијата на ленено семе придонесува и за полесно слабеење, односно ослободување од вишокот килограми.
Освен влакна, лененото семе е одличен извор на омега-3 масни киселини, особено т.н. алфа-линоленска киселина (ALA), еден вид есенцијална масна киселина која телото не може да ја произведе.
Како што објаснуваат диететичарите, докажано е дека консумирањето на омега-3 масни киселини го намалува воспалението во телото, што може да помогне да се спречи развојот на хронични болести. Тоа е поврзано и со намалување на ризикот од срцеви заболувања, како што се срцев удар и мозочен удар, со намалување на високиот крвен притисок, но и со подобрување на когнитивните функции.