Полицаецот Дерек Шовен повеќе од 18 години е дел од полицијата во Минеаполис, пред да биде одговорен за смртта на Афроамериканецот Џорџ Флојд. Против него е подигнато обвинение за убиство, Америка бара правдата да биде задоволена. Што е познато за Дерек Шовен?
За него не се знае скоро ништо. Познато е дека има 44 години и е од Минесота. Во полиција работи од 2011 година. Живее во предградие на Минеаполис, а поседува и куќа на Флорида.
Ова не му е прв инцидент. До овој месец против него се поднесени 18 жалби кои ги разгледува Секторот за внатрешна контрола. Два случаи се завршени со прекор, поради употреба на навредлив тон и пцости.
Во 2006 година Шовен беше еден од шесттемина полицајци поврзани во сомнителниот случај со Веј Рејнс, осомничен за убиство на неговата девојка и пријател, убиен кога од своето возило вперил пиштол во полицајци. Не е познато кој полицаец пукал во него.
Според протоколот, сите полицајци, меѓу кои и Шовен, биле испратени на платено отсуство, а исходот од истрагата не е познат.
Тоа што сега се знае за Шовен е дека по апсењето е префрлен во затвор за највисоко ниво на обезбедување во Минесота. Во затвор му е овозможен пристап до телефон и видео-посети, посети во живо не се дозволени поради епидемијата со коронавирусот.
Една работа што ги поврзува е фактот дека Џорџ Флојд и Дерек Шовен работеле како обезбедување во Ел Нуево родео клубот, но нема информации дали се познавале. Флојд доаѓал во вторник како помош, а Шовен скоро 17 години го обезбедувал клубот, кога не бил на должност.
Сопругата на Дерек, Кели е бегалка од Лаос. Таа поднесе барање за развод од Шовен и промена на презимето. Таа го остави сопругот на 28 мај, ден пред да биде поднесено обвинението за убиство на Флојд. Во брак беа 10 години, пренесе CNN.