Полигонот за ракетни тестирања, кој севернокорејскиот лидер Ким Џонг Ун вети дека ќе го уништи, всушност е голем објект во западниот дел на Северна Кореја.
Споменатиот полигон се користи за тестирање на ракети од долг домет.
Претседателот на САД, Доналд Трамп, после самитот со Ким на 12 јуни, изјави за новинарите дека севернокорејскиот лидер ветил дека ќе уништи еден од своите ракетни полигони, што ќе биде едно од најконкретните дела на Северна Кореја од утврдените точки на состанокот во Сингапур, а Трамп тогаш не прецизираше точно за која локација станува збор.
Меѓутоа, неименуван американски функционер вчера изјави дека станува збор за полигонот Сохае, за лансирање на сателити на запад во земјата, додавајќи дека Северна Кореја „ја користела оваа локација за тестирање на мотори на течно гориво за своите балистички ракети со долг домет“, пренесуваат светските меидуми.
Сохае е полигон воспоставен во 2008 година, а во негова близина се наоѓа и одредиште за ракетен развој, како и кула за поддршка на балистичките ракети.
Овој полигон претежно се користеше за тестирање на големи мотори за ракети од долг домет, како што е „Хвасонг-15“.
Северна Кореја има и други објекти за тестирање на ракети, но ако се реализира уништувањето на овој полигон, тоа би било од големо значење, укажуваат некои аналитичари, додека други сметаат дека затворањето на полигонот би било повеќе симболичен гест, отколку потег со кој технички би се онеспособиле ракетните капацитети на оваа земја.
Не е познато кога точнo Северна Кореја би можела да го затвори овој полигон, а покрај тоа, Пјонгјанг нема јавно потврдено дека Ким ветил такво нешто, пренесуваат светските медиуми.
Американскиот министер за одбрана, Џејмс Матис, вчера за новинарите изјави дека „не знае ништо“ околу тоа дали Северна Кореја почнала да прави нешто во правец кон денуклеаризација.
„Тоа е всушност самиот крај на процесот. Детални преговори не се започнати. Не би го ниту очекувал тоа во овој момент“, изјави Матис.
Група задолжена за следење на активностите на Северна Кореја со седиште во САД, под назив „38 North“, соопшти дека анализа од крајот на минатата недела покажува дека нема никакви знаци за каква било активност во правец на уништување на полигонот Сохаеили кој било друг полигон за ракетни проби.
Иако Трамп го фалеше самитот во Сингапур како голем успех, скептици го поставуваат прашањето дали тој воопшто нешто постигна таму, во однос на тоа дека Пјонгјанг, кој одби еднострано нуклеарно разоружување, нема ветено ништо ново во заедничката писмена декларација.
