Исхраната богата со домати и овошје е добра за здравјето од повеќе причини, од намалување на ризикот за рак на кожа до јакнење на имунолошкиот систем. Според едно најново ситражување, овие намирници може и да помогнат во обновување на функцијата на белите дробови кај поранешни пушачи.
Секоја година, околу 55% од пушачите се обидуваат да ги остават цигарите. Кога ќе престанете да пушите значително го намалувате ризикот од болести на белите дробови, од хронични опструктивни болести до рак.
Здравјето на белите дробови откaко ќе се прекине со пушење е тема што предизвика голем интерес кај многу поранешни пушачи и професионалци од областа на медицината.
Белите дробови почнуваат да заздравуваат веднаш откако ќе престанете со пушење, но процесот на целосно заздравување е бавен и може да трае со години. Исто така, фактот дека ќе престанете со пушење не го брише целосно ризикот од појава на болести поврзани со пушењето, посебно ако сте пушеле многу и долго време.
Друг фактор што треба да го земете предвид е фактот дека белите дробови целосно „созреваат“ во периодот меѓу 20 и 25 години, а по 35-тата, функцијата на белите дробови почнува да слабее и дишењето постепено станува отежнато. Тоа се случува бидејќи мускулите со годините губат еластичност, а алвеолите нивниот облик.
Истражувањето на научниците од школата за јавно здравје „Џон Хопкинс“ во Балтимор покажа дека исхраната богата со домати и свежо овошје, посебно јаболка, го намалува ризикот од хронични опструктивни болести на белите дробови кај поранешните пушачи, а исто така го забавува природното стареење на функциите на белите дробови.
Магичниот број, според истражувачите, се два домати и три парчиња свежо овошје дневно.