Температурите растат, па многумина (одново) станаа свесни колку е важно да се пие вода.
Но, како што открива една најнова анализа, внесувањето доволно течности е само еден дел од одржувањето на здравјето. Имено, важно е да обрнете внимание на материјалите од кои се направени чашите или шишињата од кои пиете вода.
За многумина, најчесто е најлесно да посегнат по пластично шише за вода, но освен што е штетна за околината, пластиката може да му наштети и на вашето тело.
Според Фондацијата Томсон Ројтерс, едно лице внесува просечно 20 килограми пластика во својот организам во текот на животот. Се разбира, веројатно никој всушност не јаде пластика. Барем не свесно. Микропластиката е составена од мали микрочестички на кои се распаѓаат пластичните производи. Но, важно е да се знае дека оваа микропластика може да го најде патот до нашето тело најчесто преку храна што претходно била спакувана во пластично пакување.
Според Светската здравствена организација и непрофитната новинарска организација Orb Media, пластичните шишиња со вода може да содржат најмногу микропластики во споредба со другите пијалоци, објави Business Insider.
Неодамнешните извештаи од Харвард, Школата за јавно здравје во Чикаго и други медицински научни институции исто така откриле дека одредени хемикалии кои се наоѓаат во пластиката, како што се фталатите и бисфенолите А, можат да дејствуваат како токсини на телото и се поврзани со одредени видови на рак, како на пр. рак на дојка и рак на црн дроб.
Сепак, важно е да се нагласи дека се потребни многу повеќе истражувања за ефектите од употребата (и консумирање) на пластични хемикалии, но веќе треба да се прашувате дали вреди воопшто да се ризикува.
