Без разлика дали одите во теретана секој ден или само воспоставувате рутина за вежбање, може да биде тешко да се знае дали и кога треба да јадете пред тренинг.
Можеби вашето претпочитано време од денот за вежбање е утрото и само сакате да тргнете пред нешто да ве исфрли од вашата рутина. Сепак, некои луѓе се плашат дека ќе почувствуваат мачнина ако јадат непосредно пред утринскиот тренинг, но се плашат и дека не треба да тренираат на празен стомак.
Диететичарите веруваат дека вежбањето на празен стомак не е секогаш безбедно, ниту е ефикасно. Ова делумно зависи од видот на вежбите што планирате да ги правите.
Диететичарот Мајкл Ривис истакнува дека кардиоваскуларните вежби со низок интензитет како што се одење, трчање, лесно пливање, јога, возење велосипед или лесни до умерени вежби со тежини до 75 минути се најдобри доколку планирате да тренирате на празен стомак.
Ривис објасни дека кога телото е во состојба на глад за време на 75-минутен тренинг, ги користи резервите на гликоген во телото. Гликогенот е форма на гликоза што телото ја користи за енергија.
„Можеме да вежбаме на празен стомак поради гликогенот и способноста на телото да ги користи складираните телесни масти како енергија. Меѓутоа, кога вежбаме со висок интензитет - 85% од максималната срцева фрекфенција - станува предизвик за телото да ги задоволи своите енергетски потреби со телесните масти, бидејќи метаболизмот на мастите е побавен од метаболизмот на јаглени хидрати“, објасни тој.
Постот всушност може да го направи вашиот тренинг помалку ефикасен. Диететичарката и нутриционистка Џулија Лонг исто така рече дека можете да правите тренинзи со низок интензитет на празен стомак, но дека е важно да се храните правилно пред поинтензивен тренинг.
„Проблемот со тренинзите на гладно кои траат подолго од 75 минути е што може да имате помалку енергија за време на тренингот поради недостаток на „гориво“, што може да влијае на вашата издржливост и резултати. Ова значи дека вашиот тренинг ќе биде помалку ефикасен затоа што нема да имате енергија да дадете сѐ од себе“, објасни таа.
Ако не јадете пред интензивен тренинг (како кревање тешки тежини или кој било тренинг што трае подолго од 75 минути), Лонг рече дека не само што вашиот тренинг нема да биде толку ефикасен, туку може да предизвика повеќе штета отколку корист.
„За време на интензивно вежбање, вашето тело може да почне да го разградува мускулното ткиво за енергија ако гликогенот е низок, особено ако сте во состојба на глад“, рече таа.
Дополнително, интензивниот тренинг на празен стомак може да го зголеми нивото на хормонот на стрес - кортизол - што може да го отежне закрепнувањето.
