Холивудскиот актер Арнолд Шварценегер беше во посета на поранешниот нацистички логор Аушвиц во Полска и повика светот да се бори против омраза и дискриминација.
Седумдесет и петгодишниот актер е роден во Австрија како син на некогашен припадник на нацистичка партија, кој служел во германската војска во време на Втората светска војна.
Шварценегер и претседателот на Фондацијата на еврејскиот центар Аушвиц, Симон Бергсон, син на Евреи кои го преживеале холокаустот, се пример дека предрасудите можат да се избришат уште во идната генерација.
„Бергсон е роден по Втората светска војна во прекрасно еврејско семејство, а јас сум син на човек кој бил војник во нацистичка војска. Ние сме втора генерација и заедно се бориме против предрасудите, омразата и дискриминацијата“, изјави Шварценегер.
Над 1.1 милион луѓе, главно Евреи, починаа во гасните комори од глад, болести, замрзнување во Аушвиц во логорот што нацистите го воспоставија во окупираната Полска во текот на Втората светска војна.
Шварценегер му одаде почин на местото „Ѕид на смртта“ каде германските војници убиле илјадници луѓе во логорот, како и кај споменикот на жртви во логорот Биркенау.
Во текот на посетата се сретна и со Лидија Максимович која како тригодишно дете била доведена во логорот.
„Луѓето како неа ни помагаат никогаш да не престанеме да зборуваме за тоа што се случи овде пред 80 години. Приказната мора да остане жива, да не се заборави“, истакна актерот.
