Скандинавската држава се подготвува одново да издаде памфлет кој за првпат беше печатен за време на Втората светска војна, а во кој се објаснува како треба населението да се однесува во случај на војна и воени услови.
Околу 5 милиони памфлети ќе бидат испечатени и поделени насекаде низ Шведска како одговор на воените движења кои Русија ги презема во последните неколку месеци.
Прирачникот, мудро насловен „Ако настане криза или војна“ ќе ги посоветува луѓето како да се однесуваат во случај на „тотална одбрана“ на државата, и ќе им понуди практични совети за тоа како да го обезбедат живеалиштето, да обезбедат вода и храна, па дури и каква облека да понесат во случај на евакуација.
Секако, прирачникот ќе биде приспособен за моменталните услови, иако концептот и дизајнот ќе биде сличен како оној од Втората светска војна.
„Шведскиот народ треба да биде подготвен за секаква закана, не само војската. Немаме употребено зборови како ‘тотална одбрана’ и ‘алармантна состојба’ веќе 30 години свеста е на многу ниско ниво кај граѓаните“, рече Кристина Андерсон, која го води овој проект.
Шведската влада стана загрижена поради воените екскурзии на Русија во последните години, нивната јавна поддршка на украинските сепаратисти, како и зголемениот број воени вежби кои руската армија ги извршува на територијата на Скандинавија.
