Македонскиот претставник Силекс за противник во 1. квалификациско коло од новата сезона во Лигата на шампионите го доби азербејџански Карабаг.
Исто како и со македонското првенство, и азербејџанското не се доигра како резултат на пандемијата со коронавирусот. Но, Асоцијацијата на фудбалските федерации на Азерјџан, за разлика од ФФМ, го прогласи првопласираниот тим за шампион и воедно учесник во квалификациите за Лигата на шампиони.
Така, екипата на Карабаг седми пат по ред е шампион на својата земја, или вкупно 8, а денеска жрепката во Нион одлучи токму овој тим да биде противник на нашиот Силекс во 1. коло од квалификациите за новата сезона на Лигата на шампиони.
Со оглед на згуснатиот календар и пандемијата која сè уште трае, нема да се игра по стандардниот систем дома-гости туку ќе се игра еден натпревар, а жрепката одлучи домаќин да биде Карабаг. Натпреварот ќе се игра на 18-ти или 19-ти овој месец со тоа што доколку во регуларните 90 минути нема победник ќе се играат продолженија од двапати по 15 минути, а потоа и пенали доколку сè уште е нерешено. Во зависност од ситуацијата со вирусот во Азербејџан, УЕФА може да одлучи натпреварот да се одигра на неутрален терен.
Силекс се здоби со право да ја претставува Македонија во Лигата на шампионите на местото на првопласираниот Вардар кој не доби УЕФА лиценца.
