Земјотрес со јачина од 7 степени по Рихтер ја погоди западна Турција и предизвика голема материјална штета во Измир и околните градови.
Разорниот земјотрес е со епицентар во Егејското Море, пред Сеферихиса, во турската провинција Измир. Земјотресот се случи во 14:51 часот по локално време.
Управата за вонредни состојби во Турција (АФАД) пренесе дека загинале најмалку четири лица, а повредени се 120 луѓе.
Градоначалникот на општина Измир, Тунч Сојер, исткана дека добиле пријава дека се урнале околу 20 згради.
Најмалку четворица повредени, материјална штета на објекти и излевање на морето, е првичниот неофицијален биланс од силниот земјотрес со јачина од 6,7 степени според Рихтер на грчкиот остров Самос, јави дописничката на МИА од Атина.
Управителот на болницата на Самос, за грчката државна телевизија ЕРТ рече дека четири лица се полесно повредени.
Локалното население е на улиците, морето ги поплави крајбрежните делови на островот, а сеизмолозите предупредуваат за последователни земјотреси и можност за мало цунами.
Од Секретаријатот за цивилна заштита на Грција преку бројот за итни случаи 112, испратија порака до жителите на Самос и повик да избегнуваат опасни објекти, да останат на отворено, да не ги користат телефоните непотребно, да останат подалеку од плажите, да ги следат медиумите и дека постои опасност од големи бранови.
Силниот земјотрес беше почувствуван речиси во сите делови на Грција и во Атина иако е на голема оддалеченост од епицентарот.