Купувачите на суперјахтата Silent 120 Explorer ќе можат да преминуваат океани, да летаат и да ги истражуваат длабочините.
Австрискиот производител на соларни бродови Silent-Yachts најави соработка со компаниите VRCO и U-Boat Worx во рамки на која новото луксузно пловило Silent 120 Explorer ќе биде понудено со дрон за човечки екипаж и мини подморница.
Оваа суперјахта долга 36,7 метри и широка 13,85 метри може да се движи со брзина од 6 до 8 јазли во режим на продолжено крстарење, односно 16 јазли при полна сила, а сето тоа благодарение на електричниот погон од 340 kW, кој го покренуваат литиумјонски батерии од 800 kW кои се напојуваат преку соларни панели од 40 kW на самиот кров, што на ова пловило му дава потенцијално неограничен домет.
Сепак, производителот мислел на сѐ, па доколку батериите не можат да ги задоволат потребите на имотните корисници, има и три генератори на внатрешно согорување кои ќе дадат поддршка доколку има потреба.
Silent-Yachts веќе почна со изработка на првата суперјахта која ќе се најде во вода наредната година и за која велат дека речиси и да не бара одржување благодарение на најсигурниот морски погон без емисии. Производителот исто така се фали со нечујно работење, како и можност за преминување океани, додека купувачите благодарение на гаранцијата ќе бидат сигурни дека батериите нема да потфрлат барем 8 години, како и дека соларните панели ќе траат дури 25 години.
Бидејќи електричниот погон е главен приоритет на производителот, тука се и соодветни електрични играчки за целосна авантура која овој луксузен катамаран ја нуди - подморница и дрон.
Производителот во соработка со компанијата U-Boat Worx на купувачите им обезбеди можност на своите патувања да го носат и NEMO, подводно возило кое може да го истражува морското дно до 100 метри во длабочина, како и сите суштества кои се наоѓаат во рамки на таа метража. Во оваа минијатурна подморница можат да влезат двајца и да минат дури 8 часа под површината.
За сопствениците да можат да се забавуваат во воздух, тука е eVTOL леталото на компанијата VRCO. Наречен XR4, овој електричен дрон нуди 4 седишта за патници, може да лета со брзина од 296 км/ч, а неговата автономија е максимално 1 час. Некои од дополнителните функции вклучуваат летање со помош на автопилот, ситем за падобрани за евакуација, како и технологија за спречување пад и судир. Дронот е стациониран на врвот на јахтата така што соларните панели се отвораат и откриваат хелиодром.
