Играчот на Манчестер Сити, Бернарду Силва, вели дека не верува дека неговиот соиграч Ерлинг Холанд ќе ја освои Златната топка за најдобар играч во светот, пренесуваат британските медиуми.
Холанд сезонава постигна 52 гола на 48 натпревари во сите натпреварувања. Сепак, Португалецот Силва тврди дека фудбалерот на ПСЖ, Лионел Меси е фаворит за наградата Златна топка со оглед на тоа што со Аргентина ја освои титулата светски шампион на Мундијалот во Катар. Меси беше прогласен и за најдобар играч на светскиот собир.
„Ако Холанд ги освои Лигата на шампионите и Премиер лигата, тогаш можеме да разговараме за Златната топка. Овој трофеј може да го освои и Винисиус Жуниор ако Реал повторно стане европски првак. Тоа ќе биде вистинска борба помеѓу победникот во Лигата на шампионите и Меси, а мислам дека никој нема шанси со Аргентинецот“, изјави Силва.
Меси сезонава за ПСЖ постигна 20 гола на 38 натпревари во сите натпреварувања, а имаше и 19 асистенции. Холанд има 8 асистенции.