Диего Симеоне е сѐ уште во неверување дека повеќе го нема неговиот поранешен соиграч и добар пријател.
Како и цела Аргентина, во неверување се и фудбалските пријатели на Марадона. Еден таков е стратегот на мадридски Атлетико, Диего Симеоне.
„Тешко е. Кога ќе ти се јават и ќе ти кажат дека починал Диего, си велиш 'Диего не може да умре'“, вели Симеоне.
„Заминува легенда, Аргентинец кој целиот својот бунт на борба помеѓу неговите позитивни и негативни страни ги претвори во одење само напред. Само со гледање како игра можеше човек да се возбуди за фудбалот“.
Симеоне и Марадона играа заедно во Севиља во сезоната 1992/93 кога помладиот тогаш пристигна, а постариот наредното лето замина во татковината. Играа заедно и во репрезентацијата на Аргентина за која настапија на Мундијалот 1994 во САД.
„Во моментот кога ќе ти кажат за неговата ситуација, си велиш: 'Не е можно, тој секогаш се враќа'. Овој пат не може да се врати, но тој секогаш ќе биде со нас, особено со Аргентинците, тој е легенда и ни предизвикува еден куп тага и празнина - не е можно“.
