Силекс денеска игра во квалификациите од Лигата на шампиони во еден решавачки натпревар на гости кај азербејџански Карабаг.
Тренерот на кратовскиот тим, поранешниот голман Горан Симов, вели дека неговите играчи во овој натпревар гледаат како остварување на сонот со настап во Лигата на шампиони, макар што се работи за квалификациски натпревар.
„Карабаг е силен тим, кој што има неколку репрезентативци. Дојдовме тука за исполнување на сонот. Не размислуваме за пари. Дојдовме да го исполниме сонот. Пред извесно време размислувавме за опстанок, а сега играме во Лигата на шампиони. Резултатот може да биде 0:0, 0:5 или 0:7, нема разлика. Важно е да ја доживееме емоцијата на Лигата на шампионите“, рече Симов на вчерашната прес-конференција во азербејџанската престолнина.
Пред заминувањето за Азербејџан, Силекс прво направи тестирање на целиот тим, а резултатите на сите беа негативни на COVID-19.
Силекс ја претставува фудбалска Македонија во Лигата на шампионите на сметка на Вардар. ФФМ не прогласи првак во прекинатото македонско првенство, но одлучи екипите да одат во европските натпреварувања според актуелниот пласман во моментот на прекинот. Но, бидејќи Вардар не доби УЕФА лиценца, Силекс како второпласиран го зема неговото место во Лигата на шампиони.
„Силекс е млад тим и возбудени сме што тимот ќе игра во Лигата на шампиони. Никој не ни даваше шанса, но во финишот на првенството одигравме одлично и еве нѐ во ова натпреварување“, вели Симов.
Кратовчани синоќа одржаа и тренинг сесија на „Тофик Бахрамов“ стадионот на кој денеска од 18 часот по македонско време (20 по локално) ќе се игра натпреварот. Бидејќи се игра еден натпревар без реванш, доколку по 90 минути нема победник ќе се играат продолженија од двапати по 15 минути, а доколку и тогаш нема победник ќе се шутираат пенали. Правдата ќе ја дели украинскиот судија Јарослав Козик.
За Силекс ова ќе биде трето учество во Лигата на шампионите и прво по летото 1998 кога уште во првото коло беше елиминиран од белгиски Бриж. Една сезона претходно ја доживеа истата судбина играјќи против израелски Бејтар.
Фото: ФК Силекс Кратово