Посетителите на долгоочекуваната ревија на Модната недела во Париз гледаа десетминутна епизода од анимираната серија „The Simpsons“ во која Хомер, Марџ, Барт, Лиса и Меги ја претставија колекцијата на Balenciaga.
Ликовите се пошегуваа за угледот на споменатата модна куќа поради необичниот дизајн и прескапите цени на парчињата облека. Марџ се заглави додека минуваше низ врата бидејќи прерамките на фустанот што го носеше беа преголеми, а Хомер за малку ќе се онесвестеше кога виде дека облеката чини дури 19.000 долари.
Хомер по модната писта прошета со очила за сонце и јакна со лого на Баленсијага. Барт возеше скејтборд облечен во бела маица, фармерки и кожени чизми. Лиса и Меги носеа црвени фустани кои при дното се шират.
Во епизодата се појавија и други ликови од популарната серија како Пети и Селма Бувие, Смитерс и Вигум. Сопственикот на пабот, Мо Шислак, исто така брилјираше во јакната и чизмите на Balenciaga.
Марџ „го украде шоуто“ во златен фустан со лак на грбот, а со аплауз ја наградија Ким Кардашијан, Кање Вест, Џастин Бибер и други познати личности.
