Крвава семејна драма се случила синоќа во Скопје, каде син до смрт го избодел со нож својот татко.
Настанот се случил во скопската населба Црниче. Сосетка од улицата „Чедомир Каратџиев“ пријавила во полиција околу 22:15 часот дека соседи се степале и барале помош.
Неофицијално избодениот татко е поранешен претседател на ОК на ВМРО-ДПМНЕ во Кисела Вода, со иницијали Љ.Т., кој наводно бил директор на фабрика.
Кога пристигнала полицијата го пронашла 68-годишниот скопјанец на прагот од дневната соба со убодни рани од нож и констатирала смрт. Сведок на настанот била сопругата. Според нејзиното сведоштво таа седела со сопругот во дневната, кога дошол синот, ја скршил влезната врата и ја избркал неа, а потоа го нападнал својот татко.
Од Министерството за внатрешни работи велат дека 41-годишниот син ја напуштил куќата веднаш по убиството. Подоцна се пријавиле во Ургентен центар барајќи лекарска помош затоа што имал расекотина на десната рака.
Синот е синоќа приведен и задржан во полициската станица во Кисела Вода. Најверојатно има дијагноза на психичко растројство.
