Хантер Бајден, син на американскиот претседател Џо Бајден, се изјасни за виновен за затајување данок во четвртокот, што беше изненадувачки потег за да се избегне потенцијално непријатно судење неколку недели пред претседателските избори во САД.
На Бајден во четврток требаше да му се суди пред федералниот суд во Лос Анџелес под обвинение дека не платил 1,4 милиони долари данок додека трошел на дрога, секс и луксузни предмети.
На почетокот на рочиштето тој се изјасни за виновен по сите девет точки од обвинението.
Судијата Марк Скарси му кажа на Бајден дека се соочува со затворска казна до 17 години и парична казна до 450.000 долари.
Изрекувањето на пресудата е на 16 декември.
Обвинетите кои ја признаваат вината во кривичните случаи обично склучуваат договори со обвинителите однапред, надевајќи се дека ќе добијат помала казна во замена за избегнување на судење.
Се чини дека тоа не е случај овде.
Бајден рече дека се изјаснил за виновен за да го поштеди своето семејство од судење кое ќе открие засрамувачки детали од периодот од неговиот живот кога бил зависник од дрога.
„Со оглед на сè што сум ги направил низ годините, можам да ги поштедам од ова“, рече тој.
Тој додаде дека го платил данокот.
Хантер Бајден, кој беше отворен за неговите борби со зависноста од дрога и алкохол, е обвинет за затајување данок од 2016 до 2019 година додека трошел огромни суми „на дрога, девојки за придружба, луксузни хотели и имоти за изнајмување, егзотични автомобили, облека и други предмети од лична природа“, се наведува во обвинението.
Белата куќа соопшти дека претседателот Бајден ја отфрлил можноста за помилување на неговиот син.
