Тешки престрелки избувнаа во Северно Мексико, откако силите за безбедност уапсија еден од синовите на нарко босот Хоакин Гузман, познат како Ел Чапо, кој отслужува затворска казна во САД.
Вооружените престрелки траеја неколку часа откако Овидио Гузман Лопез (28) беше откриен и фатен во рутинска патрола во градот Кулиакан.
Во снимките објавени на локалните телевизии може да се видат вооружени лица со тешко наоружување како пукаат кон полицијата, а на улицата се расфрлани оштетени возила, мртви тела и изгорени барикади.
Овидио подоцна беше ослободен „за да се одбегне понатамошно насилство“, рекоа властите.
Мексиканскиот министер за безбедност Алфонсо Дуразо изјави дека патрола на вооружената полиција Национална гарда била пресретната со отворен оган од правец на куќата каде Овидио престојувал, при што полицајците морале да се повлечат.
Синот на Ел Чапо бил уапсен во акцијата, но подоцна бил пуштен „за да се одбегне повеќе насилство во областа и да се заштитат животите на нашите полицајци, но и да се врати мирот во градот“, рече Дуразо.
Мексиканскиот претседател Андрес Мануел Лопез Обрадор рече дека ќе одржи средба на неговиот Кабинет за безбедност на кој ќе се дискутира за инцидентот.
Обрадор беше избран благодарение на предизборните ветувања за сузбивање на нарко картелите. Откако дојде на власт ја формираше новата безбедносна единица Национална гарда чија задача е да се справува со нарко картелите.
Под водство на Ел Чапо, картелот Синалоа беше најголемиот снабдувач со дрога за САД.
Откако тој е во затвор, се смета дека картелот делумно го контролира Овидио, врз кого се покренати обвиненија за шверц на дрога во САД.
Ел Чапо (62) беше осуден по 10 точки од суд во САД, вклучувајќи шверц на дрога и перење пари.
