Синтетичките хемикалии наречени фталати, кои се наоѓаат во производите за широка потрошувачка, како што се кутии за храна, шампони, шминка, парфеми и детски играчки, можат да предизвикаат 91.000 до 107.000 предвремени смртни случаи годишно.
Смртта предизвикана од фталати главно се јавува кај луѓе на возраст од 55 до 64 години. На смртните случаи им претходат кардиоваскуларни заболувања. Истражувањето беше спроведено во САД и беше објавено во списанието Environmental Pollution.
Се проценува дека овие смртни случаи може да ги чинат САД од 40 до 47 милијарди долари годишно поради губење на економската продуктивност, односно продуктивноста на трудот, пренесува CNN.
„Истражувањето стана дел од растечката база на податоци за влијанието на пластиката врз човечкото тело. Тоа покажува колку е всушност потребно да се намали или забрани употребата на пластика“, вели главниот автор на истражувањето, Лионардо Трасанд.
Познато е дека фталатите го попречуваат механизмот за производство на хормони во телото, познат како ендокрин систем. Тие се поврзани со развојни, репродуктивни, невролошки, имунолошки и други проблеми, според Националниот институт за здравствени науки за животната средина (National Institute of Environmental Health Sciences).
Дури и малите хормонални нарушувања можат да предизвикаат сериозни тешкотии во развојот, според NIEHS. Претходните истражувања ги поврзаа фталатите со репродуктивни проблеми, дебелина, астма и рак.
