Повеќе од 25 илјади сириски бегалци ја преминаа границата од Турција кон Сирија во последните две недели, по падот на претходниот сириски режим, и се вратија во својата татковина. Ова денеска го соопшти турското Министерство за внатрешни работи.
Претходно достапните податоци објавени од турските власти покажаа дека во периодот од 9 до 13 декември, веднаш по падот на диктаторот Башар ал-Асад, од Турција во Сирија се вратиле 7.621 лице.
Турција, која дели повеќе од 900 километри долга заедничка граница со Сирија, продолжува да засолнува околу 2,92 милиони Сиријци кои избегаа од граѓанската војна од 2011 година, изјави денеска министерот за внатрешни работи Али Јерликаја за државната новинска агенција Anadolu. Повеќе од 500 илјади од нив живеат во Истанбул, нагласи тој.
Во турската амбасада во Дамаск и конзулатот во Алепо ќе бидат формирани канцеларии за миграција за да им се пружи помош на бегалците кои се враќаат во Сирија, додаде Јерликаја.
Анкара се надева дека голем број бегалци ќе се вратат во Сирија по падот на Асад, што може да помогне да се смират силните антисириски чувства кај турското население. Турските власти, исто така, ќе дозволат еден член од секое бегалско семејство да отпатува во Сирија и да се врати во Турција уште три пати во првата половина на следната година, како дел од подготовките за преселување, додаде министерот.
