Русија ја обвини Турција дека пратила „терористи“ од Сирија и Либија во борбите за регионот Нагорно-Карабах, каде четири дена беснее крвав конфликт меѓу Азербејџан и ерменските сили.
Руското Министерство за надворешни работи вчера обвини дека во регионот се испраќаат сириски и либиски борци од нелегални вооружени групи.
Русија ги повика земјите вмешани во конфликтот да спречат користење на „странски терористи и платеници“ во борбите. Неколку светски медиуми објавија дека во борбите се загинати најмалку тројца сириски борци.
Два извора од сириските бунтовници соопштија дека Турција испраќа сириски бунтовнички борци во поддршка за Азербејџан, нешто што и Турција и Азербејџан го негираат.
Ерменија, пак, објави фотографии од остатоците од нејзиниот SU-25 борбен авион за кој тврди дека бил соборен од турски F-16, обвинувајќи дека Анкара му дава воена помош на Азербејџан.
Претседателот на Азербејџан Илхам Алијев ги негираше шпекулациите дека Турција учествува во конфликтот за спорната територија.
„Турција не е дел од конфликтот и не учествува во него“, рече тој и додаде дека Турција е има исклучиво „улога на стабилизатор во регионот“.
Азербејџан вчера соопшти дека „неутрализирал“ 2.300 ерменски војници, во најлошото избувнување на насилство меѓу двете земји по прогласувањето прекин на огнот во 1994 година во врска со азербејџанската територија на која живеат главно етнички Ерменци.
