Домаќините остварија победи во синоќешните први четвртфинални натпревари, но и двете гостински екипи успеаја да постигнат гол кој остава надеж дека не е сѐ завршено.
Манчестер Сити во 19-тата минута преку Кевин Де Брујне поведе против Борусија, рано водство кои сите ги залажа дека ќе следува голеада.
Мрежите мируваа сѐ до 84. минута кога Марко Ројс го израмни резултатот на изненадување на домашните.
Сепак, во последната минута Фил Фоуден погоди за победа на „Граѓаните“, победа која со примен гол на домашен терен не е воопшто никаква причина за мирен сон до реваншот во Дортмунд.
На „Алфредо Ди Стефано“ стадионот во Мадрид копјата ги вкрстија Реал Мадрид и Ливерпул, два клуба кои заедно тежат 19 трофеи во ова натпреварување.
„Кралевите“ по првите 45 минути заминаа со водство од 2:0 благодарение на головите на Жуниор Винисиус во 27. и на Марко Асенсио во 36. минута.
Само шест минути по паузата Мохамед Салах ја врати надежта на Ливерпул постигнувајќи важен гол на гостински терен, иамо петнаесетина минути подоцна Винисиус ги постави конечните 3:1.
Со оглед на тоа што во УЕФА натпреварувањата важи правилото за гол на гости, и Борусија и Ливерпул се и тоа како во игра за пласман во полуфиналето. Реваншите се закажани за среда, 14 април.
Вечерва се играат и преостанатите два четвртфинални натпревари, а се среќаваат Баерн - ПСЖ и Порто - Челси.