Манчестер Сити оствари голема победа синоќа над ПСЖ и е многу блиски до долго очекуваниот сон, пласман во големото финале од Лигата на шампионите.
Почетокот на натпреварот не навестуваше таква завршница за „Граѓаните“. Во 15-тата минута Маркињус со глава ги донесе „Светците“ во водство по нафрлувањето од корнер на Анхел Ди Марија. Парижаните бркаат второ последователно финале откако лани загубија од Баерн.
Гостите од Островот дојдоа до израмнување дваесетина минути по паузата кога Кевин Де Брујне сакаше да нафрли, никој не ја стигна топката, а домашниот голман Кејлор Навас беше изненаден и само ја испрати во својата мрежа.
Пресвртот брзо дојде потоа. Во 71. минута Ријад Махред одлично изведе слободен удар успешно протнувајќи ја топката низ живиот ѕид од домашни фудбалери и по втор пат го натера костариканскиот голман да ја вади топката од мрежата.
До крајот ПСЖ не само што не успеа да избегне пораз, туку и остана со играч помалку откако Идриса Геје доби директен црвен картон во 77. минута поради остар старт врз Илкај Ѓундоан.
Реваншот е закажан за вторник, 4 мај, на „Итихад“ стадионот во Манчестер.