Капитенот на Манчестер Сити, Венсан Компани, еден месец ќе биде надвор од тимот откако во вторникот ја обнови повредата на листот, соопшти менаџерот на „граѓаните“, Мануел Пелегрини. Компани се повреди на мечот со Динамо Киев во Лигата на шампионите, а покрај капитенот мечот предвреме го заврши и неговиот партнер од одбраната Николас Отаменди.
Компани, од доаѓањето во Сити во 2008 година, неверојатни 14 пати ја обновува истата повреда, поради која сезонава настапи на само 13 натпревари во Премиер лигата.
Компани е исклучително значаен играч за Сити. Без него во тимот, Харт прима гол на секои 70 минути, а кога е Компани во тимот, мрежата на „граѓаните“ се тресе на 156 минути.
Дополнителен проблем за менаџерот Пелегрини претставува и повредата на вториот дефанзивец Отаменди.
Повредите на двајцата клучни играчи во одбраната доаѓаат пред веројатно најзначајниот меч во сезоната за Сити, дербито со Манчестер Јунајтед.
