Манчестер Сити владее во својот град откако попладнево триумфираше над лутиот градски ривал Манчестер Јунајтед со 2:0 и тоа како гостин.
Победата на „Граѓаните“ беше најавена уште по само 7 минути игра откако Брежанецот Ерик Баји си постигна автогол во обид со лизгачки старт да го расчисти нафрлувањето на Жуау Канселу на прва статива.
Сити победата ја запечати во последната минута од првиот дел кога Бернарду Силва одлично се снајде по нафрлувањето од Канселу, кој пак запиша втора асистенција.
„Црвените ѓаволи“ не успеаја сериозно да се заканат и во цели 90 минути забележаа само еден удар во рамките на гостинскиот гол, кој голманот Едерсон го одбрани.
Манчестер Сити барем за момент ќе биде на 2. место со 23 бода, а таму ќе остане доколку Ливерпул не слави на гостувањето кај сезонава одличниот Вест Хем.
Манчестер Јунајтед го запиша четвртиот пораз и останува на 17 бодови ризикувајќи да го загуби 5. место во зависнсот од останатите резултати од ова 11. коло.