Специјалното јавно обвинителство денеска на прес-конференција информираше дека е побарана мерка притвор за лидерот на ВМРО-ДПМНЕ, Никола Груевски, како обвинет за случајот „Талир“, којшто го отвори ова обвинителство.
Специјалната обвинителка Катица Јанева вели дека на истекот на законскиот рок се поднесени 17 обвиненија за 18 предмети, кои во текот на денешниот и утрешниот ден ќе бидат доставени до судот.
„Со оглед на тоа дека во предметите има повеќе барања за притвор, меѓу кои и за лидер на политичка партија, судот мора да ги процесуира во итна постапка, односно во рок од 24 часа“, вели Јанева.
Таа изрази надеж дека експертите, професорите, јавноста во земјава ќе ја увидат потребата од постоењето на СЈО, на кое се надева дека во наредниот период ќе му биде дадена задачата за откривање висока корупција сторена во земјава.