Специјалното јавно обвинителство вчера поднесе жалба на пресудата за предметот „Тифани“ во кој новинарката Ивона Талевска се товари за затајување на данок, и бара затворска наместо условна казна.
Талевска ја призна вината на судењето во Основен суд Скопје 1 и доби условна казна затвор од две години, што значи дека во наредните четири години не смее да го повтори делото.
„До Апелацискиот суд е поднесена жалба, односно се предлага обжалената пресуда да ја преиначи во ефективна затворска казна, како главна казна и повисока парична казна, како споредна казна“, потврдија од СЈО.
Во случајот „Тифани“ Талевска се товари дека како управителка на друштвото за консалтинг „Смарт ДООЕЛ“ и на „Смарт груп ДООЕЛ Скопје“ одбегнала да плати даноци за периодот од 2008 до 2014 година, а во завршните сметки давала лажни податоци, при што одбегнала да плати 2.314.463 денари или 37.634 евра преку фирмите и 1.040.840 денари или 16.924 евра личен данок.
СЈО бара и повисока парична казна за правното лице, групацијата „Смарт“.
