Натпреварот од бразилското првенство помеѓу Васку да Гама и Интернасиунал го одбележа неверојатен настан кога ВАР технологијата не успеа да поништи гол постигнат од преочигледен офсајд.
Васку сезонава грчевито се бори за опстанок и моментално е на 17. место, последното кое води во втората бразилска лига. А, викендов играше против лидерот Интернасиунал, кој полека граби кон титулата.
Интернасиунал поведе уште во 10. минута кога Родригу Дораду со глава заби во домашната мрежа, а судијата Флавиу Родригис досуди гол. На поновената снимка јасно се гледа дека станува збор за преочигледен офсајд, но голот остана. Зошто?
Судиите во ВАР собата му соопштиле на Родригис дека видео-технологијата за проверка на офсајд во тој момент била во дефект, па судијата одличи да го признае голот бидејќи не може да се ослони на ВАР.
„Недозволиво е вакво нешто да се случи, особено не во натпревар на кој една екипа се бори за титула, а друга за опстанок“, вели Надине Бастус, поранешна бразилска судијка, а сега коментаторка на Grupo Globo.
„Васку да Гама ќе побара поништување на натпреварот со Инренасиунал“, потврди самиот клуб.
Натпреварот заврши 2:0 за Интернасиунал, а при 1:1 Васку промаши и пренал. Сега клубот од Рио побара натпреварот да се преигра поради очигледната грешка на судиите и ВАР, а доколку неговото барање биде одбиено се закани дека правдата ќе ја бара и на Судот за спортска арбитража.
На две кола до крајот Васку има 37 бода и му преостанува гостување кај Коринчјанс, а во последното коло го пречекува Гојас, директен ривал за опстанок. Додека, пак, Интернасиунал в недела игра директен дуел со второпласираниот Фламенгу кому му бега само бод.