Француски пилот поднесе тужба против своите колеги за насилство и загрозување на неговиот живот.
Имено, како дел од ритуалот за иницијација, неговите колеги го врзале за мета и пукале кон него со борбени авиони.
Жалбата е поднесена оваа недела во Марсеј, а CNN јавува дека сето тоа се случило на 27 март 2019 година во воздухопловната база Солензара на Корзика. Базата се користеше во минатото како центар за обука на НАТО.
Во тужбата се наведува дека двајцата претпоставени дале саркастични коментари пред да го принудат пилотот да облече пилотска униформа за надлетување (што може да се надува во итен случај), да ги крене рацете и да стои како „човечки часовник“.
После тоа, му ставиле качулка на главата од која не можел да види ништо и почнале да возат во непознат правец. Потоа со селотејп му ги врзале колената, рацете и глуждовите. По уште десет минути возење, непознати сторители го врзале пилотот за метата.
Во тој момент сфатил дека се наоѓа на воениот полигон северно од базата. Додека бил врзан за метата, тој тврди дека слушнал пукање на борбени авиони и дека сето тоа траело околу 20 минути. Тој верува дека некои од истрелите биле упатени кон него и дека чаури паѓале во негова близина.
После тие 20 минути, колегите го одврзале и му рекле да им се придружи. Тој морал да скока, со оглед на тоа што му биле врзани глуждовите.
Портпаролот на француските воздушни и вселенски сили Стефан Спет потврди дека снимката е автентична, но ги бранеше колегите. Тој тврди дека се создава погрешен впечаток дека борбените авиони ги насочиле истрелите кон пилотот, тој вели дека истрелите му се доближале најблиску до еден километар.
Сепак, тој вели дека инцидентот е недопустлив и е спротивен на вредностите на француската армија и дека војниците биле строго санкционирани. Сепак, адвокатот на жртвата вели дека тие немаат никакви информации за тоа и дека тој би сакал да ги знае деталите - тој вели дека ова покажува колку пилотите се недопирливи.
Тој верува дека една од причините е високата цена за обука на пилотите. Според извештајот од 2018 година, обуката на пилотите чини околу 400.000 евра.
Што се однесува до подоцнежното известување за инцидентот, адвокатот на пилотот вели дека му требало време да излезе во јавноста со тужбата, бидејќи бил во шок. Тој исто така наведува дека никогаш не добил поддршка од војската и покрај тоа што неколкупати го пријавил инцидентот.
