Градежните работници најмени за изградба на новиот стадион на Тотенхем не ги почитуваат правилата за работа на терен, туку наместо тоа пијат и се дрогираат додека работат на проектот вреден 850 милиони евра, пишува во новиот извештај за работата на терен.
Индустрискиот магазин Construction News во извештајот пишува дека има информации од прва рака дека работниците кои работат на изградбата на новиот стадион на Тотенхем користат алкохол и кокаин во работното време, што влијае на времето на изградба на стадионот.
Новиот стадион на Тотенхем досега требаше да биде завршен, но и понатаму нема ни трага ни глас од официјална објава за датумот на кој тој ќе биде отворен. Тој требаше да претставува замена за Вајт Харт Лејн, но градежните работи на проектот никако да завршат.
„Немам работено на ваков проект многу, многу долго време. Работниците доаѓаат секое утро и почнуваат да пијат, а некои од нив шмркаат кокаин во тоалетите“, откри неименуван извор за Construction News.
Изградбата на стадионот требаше да заврши на почетокот на септември, а отворањето на вратите оригинално беше закажано за 15 септември. Проблемите со градежните работи го одложија отворањето и засега Тотенхем ги игра домашните натпревари на Вембли, додека домашниот натпревар против Ватфорд во рамките на Карабао купот ќе го одиграат на стадионот на Милтон Кејнс.