Facebook го пријави првиот пад на годишниот профит во изминатите пет години, што се должи на низата скандали што ја зафатија компанијата, додека раководството уште се труди да одговори на сѐ поголемата загриженост во врска со безбедноста на податоците и содржините.
Технолошкиот гигант кој сега ги поседува и Instagram и WhatsApp, соопшти дека профитот опаднал за 16% во 2019 година на 8,4 милијарди долари.
Ваквиот пад се случи иако бизнисот за реклами одлично напредува и имаше раст на приходите од 27% во 2019 година.
Вредноста на акциите падна за повеќе од 6% на берзите.
Компанијата Facebook ги вознемири инвеститорите во 2018 година кога предупреди дека нејзините напори за зголемување на заштитата на приватноста и модерирање на соржините на своите платформи ќе се одразат негативно на профитот.
Технолошкиот гигант се соочи со критики за начинот на кој се справи со лажните вести за време на претседателските избори во САД во 2016 година, како со недозволеното споделување податоци со Cambridge Analytica. Меѓу поновите скандалозни одлуки беше онаа дека нема да врши контрола за лажни содржини во политичките реклами на социјалната мрежа.
Во јули, 2019 година, американските регулаторни тела ѝ изрекоа на компанијата рекордна парична казна од 5 милијарди долари по прашање на безбедноста на приватноста на корисниците.
Компанијата вчера соопшти дека се согласила да исплати 550 милиони долари во тужба во Илиноис во врска со користењето фотографии на корисниците за својата технологија за препознавање лица.
Шефот на Facebook , Марк Закерберг, изјави дека очекува компанијата и понатаму да биде под лупа, но додаде дека неговата цел за следната деценија „не е да нѐ сакаат, туку да нѐ сфатат“.
„Ако сакате луѓето да ви веруваат, треба да знаат за што се залагате.“
Facebook пријави приходи од над 70 милијарди долари во 2019 година, што е зголемување во однос на претходната, кога приходите изнесуваа 55 милијарди долари. Но, трошоците беа огромни и скокнаа над 51%, најмногу за подмирување правн спорови и судски трошоци.