Социјалната мрежа Facebook објави успешни финансиски резултати за четвртиот квартал на 2018 година наспроти скандалите поврзани со кражба на податоци на милиони корисници што ја потресоа компанијата минатата година.
Четвртиот квартал од 2018 година компанијата го заврши со приход од 16,9 милијарди долари, што е за 30 отсто повеќе во споредба со истиот период во 2017 година.
Вредноста на акциите на компанијата на технолошката берза Насдак во Њујорк денеска порасна за повеќе од 12 отсто.
Од Facebook посочуваат дека бројот на корисници минатата година се зголемил, но други независни експерти оценуваат дека и бројот на лажни профили на оваа мрежа се зголемил до 128 милиони.
Во 2019 година компанијата ќе се фокусира на развој на другите апликации како WhatsApp, Messenger и Instagram.
Бројот на корисниците на Facebook стагнира во САД, но интензивно пораснал во Азија, најмногу во Индија и посебно на Филипините.
Скандалот со Cambridge Analytica лани ја потресе компанијата откако се дозна дека податоците на милиони нејзини корисници биле искористени за микротаргетирање во политички цели на претседателските изборите во САД во 2016 година.
Скандалот натера многу познати јавни личности во Америка да повикаат на бојкотирање на мрежата и отстранување на апликацијата. Од CNN укажуваат дека иако милиони корисници го направиле тоа, голем дел од нив повторно ја презеле апликацијата.