Актерката Скарлет Јохансон поднесе тужба до Врховниот суд во Лос Анџелес против Disney поради прекршување на договорот, откако компанијата го прикажа филмот „Black Widow“ на својата стриминг платформа Disney+ истовремено кога започна да се прикажува и во кинатa.
Филмот истовремено е прикажан на стриминг сервисот и во киносалите, а во тужбата актерката наведе дека тоа е директно кршење на договорот меѓу неа и компанијата. Јохансон вели дека во договорот нејзината плата била поврзана исклучиво со прикажувањето на филмот во кино.
Disney смета дека овие обвинувања се без основа и дека тужбата е „особено тажна и вознемирувачка поради занемарувањето на ужасните и долготрајни глобални последици од пандемијата“.
„Disney во целост го испочитува договорот со госпоѓата Јохансон, а покрај тоа прикажувањето на „Black Widow“ на Disney+ значително ја зголеми можноста да заработи дополнителна сума и покрај досега добиените 20 милиони долари“, изјавија од Disney.
„Black Widow“ премиерно е прикажан на 29 јуни, додека во САД на 9 јули и заработи 80 милиони долари само во Северна Америка, како и уште 60 милиони долари глобално, благодарение на стриминг сервисот Disney+.
По тој успех, филмот, со буџет од 200 милиони долари, досега има заработено над 319 милиони долари и е петтиот филм со најголема заработка во 2021 година.