По бројните најави и тизери, Škoda го откри изгледот на концептот VisionS кој треба да биде основа за нивните SUV модели, а премиерата на овој концепт ќе биде на претстојниот саем во Женева.
Чешкиот SUV треба да биде официјално претставен како сериски модел за време на автомобилскиот саем во Париз, а најавите се дека би требало да се вика Kodiak.
Концептот исто така е најава и за дизајнерската насока во која ќе се движи компанијата во иднина, а е инспириран од уметничкиот правец - чешки кубизам.
VisionS е поставен на MQB платформата на Volkswagen, а е долг 4,7 метри, широк 1,91 метри, а висок 1,68 метри, со меѓуоскино растојание од 2,79 метри. Иако нема објавени фотографии од внатрешноста, Škoda најави дека кабината е проектирана за шест патници.
Веројатно најважната новина за чешката компанија е воведувањето на Plug-In хибридниот погон што за прв пат се појавува во Vision S. Тој ќе располага со 1,4 литарски турбо бензински мотор кој ќе испорачува 156 коњски сили и два електромотори. Послабиот електромотор ќе има 54 коњски сили и ќе биде наменет за предните тркала, додека вториот електромотор со 115 коњски сили ќе ќе ги придвижува задните тркала, и на тој начин ќе му овозможува 4х4 погон на VisionS.
Автомобилот ќе може да помине до 50 километри само на електричниот мотор, додека вкупната автономија со едно полнење на резервоарот и батеријата ќе изнесува до 1.000 километри. Škoda тврди дека фабрички декларираната потрошувачка е само 1,9 литри на 100 километри.
Вкупната сила на автомобилот ќе биде 225 коњски сили, кои ќе го забрзуваат до 100 километри на час за 7,4 секунди, додека максималната брзина ќе биде 200 километри на час.