ПСЖ го победи Рамс со 4:0 во 22. коло од француската Лиг 1 и со тоа потврди дека е недопирлив.
Главна приказна од натпреварот е голот и прославата на ѕвездата Серхио Рамос.
35-годишниот фудбалер летово по 16 години го напушти Реал и дојде во ПСЖ, но таму собра само пет натпревари поради повреди.
Овој против Рамс беше само негов трет како стартер и прв во првиот тим од ноември. Веројатно затоа го прослави првиот гол во ПСЖ како да го постигнал на далеку поважен натпревар.
Прославата за неговиот прв гол откако играше за ПСЖ стана вирална. Рамос веќе почна да слави откако шутираше кон голот, но претходно голманот на Рамс, Рајковиќ, одбрани. За среќа на Рамос, одбиената топка му се врати, по што погоди од вториот обид и оправдано продолжи да слави.
Инаку не е новост кога Рамос постигнува гол. Иако е дефанзивец, ова е негов 128 гол во кариерата, но затоа овој е важен бидејќи му е прв по 10 месеци. Голгетерскиот пост на легендарниот дефанзивец трае од 16 март минатата година, кога постигна гол за Реал против Аталанта.