Легендарниот аргентински кошаркар нема намера да запре дури ни во репрезентативниот дрес. И покрај поодминатата спортска возраст, тој ќе настапи на претстојната Олимпијада во Токио.
За Луис Скола стареењето очигледно е многу побавен процес отколку кај останатите спортисти. На 30 април годинава го прослави својот 41. роденден и навлезе во 42. година од животот. Но, за Скола годините се само бројка, па така тој летово ќе истрча на паркетот во Токио и ќе ја одигра неговата петта Олимпијада.
Скола има злато од ЛОИ 2004 во Атина кога Аргентина го шокираше светот прво во полуфиналето исфрлајќи го моќниот САД на Ален Ајверсон и Тим Данкан, за во финалето да ја средат Италија. Четири години подоцна во Пекинг, Скола и бело-небесносината дружина освоија бронза и оттогаш Аргентина чека кошаркарски олимписки медал.
Покрај легендата Скола, кој од лани ги брани боите на итлаијански Варезе, селекторот Серхио Ернандес во составот ги вклучи и Факундо Компасо (Денвер Нагетс), Лука Вилдоса (Њујорк Никс), Габриел Дек (Оклахома Сити Тандер), Николас Лапровитола (Реал Мадрид), Николас Брусино (Гран Канарија), Маркос Делиа (Триесте), Тажавек Галици (Институто), Патрисио Гарино (Жалгирис), Леандро Болмаро (Барселона), Хуан Пабло Ваулет (АЕК) и Франсиско Кафаро (Вирџинија Кавалирс).
Со речиси истиот состав Аргентина заврши втора на последното Светско првенство во 2019 во Кина губејќи од Шпанија во финалето.
Во Токио Аргентинците се во групата Ц заедно со Шпанија, Јапонија и Словенија против која и почнуваат на 26 јули.
