Во рамките на акцијата за собирање кабаст отпад, која во периодот од 18 до 22 мај ЈП „Комунална хигиена“ - Скопје ја спроведе во сите скопски општини, граѓаните исфрлиле вкупно 650 кубни метри отпад, составен претежно од стар мебел и неупотребливи електронски и електрични уреди.
За празнење на поставените садови, ЈП „Комунална хигиена“ - Скопје ангажираше 20 работници на терен, со употреба на три специјални комунални возила-самоподигнувачи и две возила наменети за собирање кабаст отпад - патарки.
„Жителите на градот Скопје покажаа огромен интерес за акцијата и уште при првиот ден беа преполнети речиси сите 40 поставени садови, додека за времетраењето на целата акција нашите екипи реализираа 130 тури за собирање и транспорт на собраниот отпад. Очекуваме дека оваа акција значително ќе придонесе за намалување на бројот на диви депонии на територијата на градот“, вели директорот на ЈП „Комунална хигиена“ - Скопје, Абдусамед Шабани.
Бидејќи акција покажа дека жителите на македонската престолница се заинтересирани за ваков начин на одлаѓање кабаст отпад, за очекување е ЈП „Комунална хигиена“ набрзо да ја повтори акцијата која би требало и да стане редовна пракса, со оглед на интресот.
Фото: ЈП „Комунална хигиена“ - Скопје
