Ќе се враќаат старите имиња на улиците низ главниот град кои како дел од проектот „Скопје 2014“ беа променети.
Можеби некои улици со право беа променети, некои добија имиња на личности кои заслужуваат улица, како македонските кралеви Аминта III и Филип II, но мнозинството од граѓаните никогаш не ги прифати бидејќи беа на сметка на имиња кои се вкоренија во скопската историја и свест на скопјани.
Градоначалникот Петре Шилогов објави дека улиците ќе ги вратат своите стари и препознатливи имиња. На пример, македонската престолнина повторно ќе ја има култната улица „Ленинова“, чие преименување предизвика најмногу негодувања.
Тој објави и дека Советот на Град Скопје на претстојната седница ќе расправа за дополнување на Листата на имиња на улици, плоштади, мостови и на други инфраструктурни објекти на подрачјето на Град Скопје, а во комбинација се вкупно 571 име.
Од тие 571 на предложената листа, 479 се имиња на истакнати личности од кои 79 се имиња на жени, додека пак останатите 92 имиња се имиња на поими кои означуваат поважни настани, топоними и други поими. Комплетната листа можете да ја разледате со клик тука.
„Едно од моите предизборни ветувања беше враќање на идентитетот на Скопје. Ги враќаме старите имиња на добро познатите скопски улици. Овие се само дел од нив:“, напиша Шилегов на својот Facebook профил.
