Четириесет и едногодишна жена била грабната од сопствениот дом. Киднаперот стоел на балконот од нејзината куќа, а кога таа излегла да види кој e, непознатото лице насилно ја одвлечкало надвор.
Според информациите на МВР, утрово во 3 и 30 часот, М.С. (41) во полиција пријавила дека претходната вечер, на 24 јуни, околу 22 часот противправно била лишена од слобода од непознато лице.
„Во наведеното време пријавителката била во дневната соба и забележала непознато лице како стои на балконот од нејзината куќа. Кога излегла да види кој е, непознатото лице ја фатило за коса, насилно ја одвлечкало и ја внело во патничко возило и се упатило над манастирот Св. Еремија во населба Пинтија“, пишува во соопштението од МВР.
Кога застанале, лицето со некого почнало да се допишува на мобилен телефон, М.С. успеала да ги отклучи вратите од возилото и да избега.
Полицијата презема мерки за целосно расчистување на случајот.
