Минатата недела ЈП Скопски Водовод почнал да го исклучува Акционерското друштво за стопанисување со станбен и деловен простор, од мрежата за водоснабдување, потврди директорот на Друштвото, Цветко Грозданов.
Тој изјави дека минатата недела екипи на Водовод во неколку наврати, предупредувачки, по два часа го исклучувале Друштвото од системот за водоснабдување.
Грозданов тврди дека како директор редовно ги подмирува сите трошоци и дека на име на дирекцијата се платени сите фактури за потрошена вода, но дека проблемот, кој е долгогодишен, се однесува на неколку дуќани кои биле под нивно владение, и кои неколку години не платиле сметки за вода. Најголемиот долг е направен од Капан-ан.
Грозданов вели дека имотот на Капан-Ан ѝ бил вратен на ИВЗ, а во меѓувреме насилно влегле и диво се вселиле одредени структури, но дека тој во неколку наврати барал да биде исклучено броилото бидејќи немаат владение над тој објект.
„Јас во пет наврати го известив Водовод Скопје и побарав од нив, поради тоа што не стопанисуваме со тој објект, значи го немаме владението на тој објект и немаме потреба од нивната услуга, да го исклучат броилото и да не ни фактурираат нам. Тие до ден денес упорно фактурираат“, вели Цветков.
Директорот не знаеше да објасни за колкав износ се работи, но дека за овој предмет е отворена и судска постапка. Службите за односи со јавност во Скопски Водовод не се достапни за коментар.