Скоро 80 проценти од Американците, многу од нив републиканци, го признаваат Џо Бајден за нов претседател откако медиумите го прогласија за победник заснован на водството во клучните држави на изборите на 3 ноември, покажа истражувањето на Reuters/Ipsos.
Бајден освои 279 гласови од Изборниот колеџ, наспроти 214 колку што освои сегашниот американски претседател Доналд Трамп.
Бајден освои 76,3 милиони гласови или 50,7 проценти од гласовите, а Трамп 71,6 милиони и 47,6 проценти од гласовите.
Анкетата на Reuters/Ipsos спроведена од 7 до 10 ноември, покажа дека 79 проценти од возрасните Американци веруваат дека Бајден победи на претседателските избори.
Три проценти веруваат дека Трамп победил.
За 13 проценти од испитаниците изборите сè уште не се решени, а пет проценти од испитаниците немаат мислење за тоа кој победил на изборите.
Скоро секој демократ и околу 60 проценти од републиканците веруваат дека Бајден победил.
Edison Research, истражувачката агенција која спроведува анкети за Reuters и други медиуми, во саботата објави дека Бајден победил на изборите во САД, откако го зголеми водството пред Трамп во една од клучните држави - Пенсилванија.
Трамп не го признава поразот и тврди без докази дека имало масовна измама на изборите.
Според анкетата, 70 проценти од Американците, вклучувајќи 83 проценти од демократите и 59 проценти од републиканците, им веруваат на нивните локални изборни комисии дека чесно си ја работат работата.
Истражувањето покажа дека 72 проценти од испитаниците сметаат дека губитникот мора да признае пораз, а 60 проценти веруваат дека Трамп ќе ја предаде власта мирно во јануари.
Истражувањето опфатило 1.363 испитаници.