Режисерот Мартин Скорсезе не може да се воздржи од пофални зборови за актерката Марго Роби која играше во неговиот филм The Wolf of Wall Street заедно со Леонардо ди Каприо, улога што ја почна нејзината холивудска кариера.
Режисерот ја пофали Марго за нејзината жестокост и комедиски гениј, но најмногу за уникатната храброст, во коментарот за актерката која е ставена на листата 100 највлијателни луѓе според Times.
Скросезе алудира на нејзината постапка на аудицијата за филмот, што всушност и била одлучувачка за да ја добие улогата.
„Ја доби улогата во The Wolf of Wall Street кога одлепи и му врза шлаканица на Леонардо ди Каприо, импровизација што нѐ импресионираше сите“, се сеќава Скорсезе.
Актерката зборуваше за незаборавната аудиција уште во 2015 година во интервју за Harper’s Bazaar.
Актерката одвај можела да дојде до збор од Ди Каприо во првата сцена од аудицијата и таа решила дека мора да преземе драстични чекори ако сака да ја добие улогата.
Затоа во следната сцена каде требало да го бакне Лео, таа го направила токму спротивното.
„Еден дел од мозокот ми рече, ајде и бам! Го шлапнав. А тоа не беше во сценариото. Сите замолчија и се смрзнаа“, раскажа актерката тогаш.
„Одеднаш Марти и Лео прснаа во смеа. Прекрасно беше. Лео ми викаше: Врзи ми уште една!“, вели Марго за шлаканицата што ѝ ја смени кариерата.
