Скоти Пипен веќе три години е емотивно повреден поради начинот на кој беше прикажан во серијата The Last Dance за Мајкл Џордан и неговите години со Чикаго Булс, и оттогаш дава низа горчливи изјави за најдобриот кошаркар на сите времиња.
Во неодамнешното гостување во поткаст тој рече дека Џордан бил „ужасен играч“ пред да им се приклучи на Булс.
„Го гледав Мајкл Џордан како игра пред да дојдам во Булс. Сите го гледавте како игра. Беше ужасен играч“, рече Пипен во поткастот Gimme the Hot Sauce.
„Беше страшно да се игра со него. Постојано играше еден на еден, изведуваше лоши шутеви. Потоа одеднаш станавме тим и почнавме да победуваме. Пред тоа тој не беше ни на врвот во својата категорија".
И Џордан призна дека без Пипен немало да биде она што е
Џордан несомнено играше индивидуална кошарка во првите професионални сезони и повеќе размислуваше колку поени ќе постигне, отколку како ќе победи, а дури со доаѓањето на Пипен и Фил Џексон за тренер, Булс станаа доминантна сила која ги одбележа целите деведесетти. Дури и Џордан еднаш призна дека „немаше да постои Мајкл Џордан без Скоти Пипен“.
Но, јавноста му замерува на Пипен за изборот на зборовите „ужасен играч“, а тој само уште повеќе ги разгневи луѓето со објавата на Instagram малку подоцна, кога покрај фотографијата од детството напиша: „Од скромни почетоци до шест првенства, два златни медали, Куќата на славните и водење на Чикаго Булс во победи во плејофот. Да наздравиме за неопеаните херои“.
