Словачка денеска ги засили контролите на своите граници поради опасноста од ширење на новите соеви на коронавирус во Европа, додека земјата се бори со една од највисоките стапки на смртност од COVID-19 во светот.
Министерството за здравство утврди дека секое лице кое ја преминува границата со Словачка мора веднаш да биде ставено во 14-дневна изолација. Наредено е и затворање на помалите гранични премини.
„Новиот граничен режим има за цел да спречи ширење на новите мутации на коронавирусот“, рече министерот за здравство Марек Крајчи.
Словачка во понеделникот објави затворање на некои гранични премини со Полска.
Братислава соопшти дека прекуграничните работници ќе бидат изземени од новиот режим, но сепак ќе мора да имаат негативен ПЦР тест не постар од 72 часа.
Словачка има 23 смртни од COVID-19 на 100.000 жители во последните 14 дена, што е втора највисока стапка во светот по Португалија, објави France Presse.
Од почетокот на пандемијата, Словачка има 111 смртни случаи на 100.000 жители, со што е 16-та во светот и 10-та во Европа.
Словачка е земја-членка на ЕУ со 5,4 милиони жители, се граничи со Австрија, Чешка, Унгарија, Полска и Украина.
Германија неодамна забрани влез на патници од Чешка и австриски Тирол поради зголемувањето на бројот на инфекции со новите варијанти на коронавирус.