Фудбал
КВАЛИФИКАЦИИ ЗА ЕУРО 2020

Словенечките фудбалери едвај дојдоа до Скопје

9. октомври 2019 - 18:17 | Ф.З.

Поради дефект на авионот репрезентацијата на Словенија многу покасно од предвиденото слета во Скопје каде потоа со соочи и со проблем со багажот.

Уште не беа ни тргнати за Скопје, а Словенците се изнервираа. Нивниот чартер лет од аеродромот „Јоже Пучник“ кај Љубљана не ни тргна кон Скопје во предвиденото време откако пилотите пријавиле дефект на едниот од двата клима уреди. Механичарите не можеле брзо да го отстранат проблемот, а поради зависноста на авионот од системот за ладење не е дозволено да се лета без два исправни клима уреди.

Словенечката фудбалска федерација ја има ангажирано полската авиокомпанија Enter Аir за превоз на репрезентацијата, па итно бил повикан нов авион да дојде од Полска и да ги однесе фудбалерите во Скопје каде стигнаа со закаснување од два часа.

По слетувањето на скопскиот аеродром се појавил нов проблем откако целата репрезентација цел час го чекала пријавениот багаж. Селекторот Матјаж Кек се изнервирал и наредил играчите да се упатат кон хотелот, а дел од репрезентацијата да остане и да го чека багажот кој потоа бил пренесен со камион.

„Па во Израел стигнавме побрзо!“, коментирал нервозниот Кек алудирајќи на нивното патување до Ветената земја кога играа против Израел во март.

Дали ова патешествие ќе биде мотив повеќе за Словенија или пак ќе влијае негативно врз нивното расположение, ќе видиме утре од 20.45 часот на Националната Арена „Тоше Проески“.

Коментирај