Судот во Токио го осуди серискиот убиец, познат како Twitter убиец, на смртна казна. Жртвите ги бирал на социјалните мрежи, а целел кон девојки кои размислувале за самоубиство.
Такахиро Шираиши, 30-годишен, доби пресуда дека е виновен за серијата убиства извршени во временски интервал од три месеци во 2017 година. Судот пресуди дека обвинетиот бил ментално здрав и тотално свесен што порави и со тоа одговорен за злоделата. Поради тоа, тој синоќа доби смртна казна.
Twitter убиецот уби деветмина од август до октомври 2017 година. Таргетирал тинејџери и млади лица кои биле депресивни, со нарушено психичко здравје. Преку Twitter им ветувал помош со тоа што ќе им помогнел да умрат бидејќи повеќето со самоубиствени мисли немаат храброст да го направат фаталниот чекор.
Неговите жртви ги намамувал во својот стан во Зама во префектурата Канагава. Им давал алкохол и апчиња за спиење, а откако ќе се онесвестеле ги давел или бесел до смрт. Потоа нивните тела ги распарчувал, а некои од деловите ги чувал како трофеи, други ги фрлал.
Жртвите на Шираиши биле на возраст од 15 до 26 години, а 8 биле жени, додека само еден маж. Признал дека мотивот му бил сексуално да ги злоставува девојките. Единствениот убиен маж бил дечко на една од девојките кој дошол во неговиот стан да го истражува нејзиното исчезнување.
За време на судењето Шираиши изјави дека нема да ја обжали пресудата доколку таа гласи смртна казна.