Додека во Македонија и на Балканот владеат прилично прифатливи температури за овој период од годината, остатокот од Европа се бори со снежно невреме, силни ветрови и температури под нулата.
Во Велика Британија и Германија се откажани стотици летови, а во Франција е огласен портокалов метеоаларм.
Според британски „Independent“, откажани се стотина летови од аеродромите „Хитроу“ и „Стенстед“ во Лондон, како и во Бирмингем и Лестер. Поради невремето во Британија заглавени се десетици илјади патници.
Во Германија се забележани проблеми во авиосообраќајот, а според портпаролот на аеродромот во Франкфурт, откажани се над 300 летови, а стотина се одложени поради снегот и мразот што ги блокираат пистите на најголемиот аеродром во Германија.
Околу 330 летови биле откажани до 17 часот по локално време, откако силни врнежи снег и температури под нулата го погодија регионот околу финансиската престолнина на Германија, вели портпаролот на компанијата „Fraport“ која управува со аеродромот.
Службите во Па-де-Кале во Франција, каде поради силните ветрови беше огласен портокалов метеоаларм, соопштија дека траект што превезувал над 300 луѓе се насукал поради силниот ветер во Кале во северна Франција, но дека за среќа, нема повредени.
Во Португалија и во Шпанија дуваат ветрови со орканска јачина и тамошните служби огласија предупредувања за граѓаните.