„Црвените“ се прв актуелен премиерлигашки шампион кој загубил 5 натпревари во низа на домашен терен.
И оваа сезона Ливерпул руши рекорди, но избраниците на Јирген Клоп овој пат рушат само негативни.
Откако синоќа загубија со 0:1 од Челси благодарение на голот на Мејсон Маунт постигнат на три минути пред паузата, „Црвените“ го запишаа петтиот последователен пораз на својот „Енфилд“.
Пред овој пораз Ливерпул на домашен терен загуби од Евертон со 0:2, Манчестер Сити со 1:4 и од Брајтон и Барнли со по 0:1. Згора на тоа, пред да започне оваа серија имаа две ремија, 0:0 со Манчестер Јунајтед и 1:1 со Вест Бром, што значи дека Ливерпул нема победа дома цели 7 натпревари. Претходно имаше серија од 8 победи во низа дома, низа која застана на онаа победа од 2:1 над Тотенхем.
Она што синоќа го испиша Ливерпул е: прв актуелен шампион во Премиер кој доживеал 5 позари по ред дома, како и клупски рекорд бидејќи Ливерпул никогаш во својата долга историја не загубил пет пати по ред дома.
Иначе, синоќа за малку ќе го завршеше натпреварот и без удар во рамките на противничкиот гол. Таков срам спречи Џорџињо Вајналдум во 85-тата минута.
По 27 кола Ливерпул е дури седми со 43 бодови, 22 помалку од лидерот Манчестер Сити и 4 зад Челси кој го држи последното место кое води во Лигата на шампионите.
